АҞӘА, абҵара 3 - Sputnik, Сариа Кәарцхьиаԥҳа. Аҵараиурҭақәа рҵарадырратә программақәа аҩбатәи рцәыргақәҵа хыркәшоуп Аҟәа.
Аԥсуа абитуриентцәа рзы рҵарадырратә программақәа ӡырыргеит урыстәылатәи иреиҳаӡоу аҵараиурҭақәа 12.
Аԥсны иҟоу Россотрудничество Ахаҭарнакра анапхгаҩы Дмитри Федотов иажәақәа рыла, ауснагӡатә иалахәын Аԥсны араионқәа зегь рҟынтәи ашколхәыҷқәа.
"Ари ацәыргақәҵа цхыраагӡоу аԥсуа школхәыҷқәа рзы, дара аҵараусбарҭақәа ирнаҭо алшарақәа лабҿаба ирбарц рылшоит. Апрограммақәеи, аҽазыҟаҵаразы ахырхарҭақәеи рзы ирымоу азҵаарақәа аҵараиурҭақәа рхаҭарнакцәа иразҵаартә алшара рымоуп", - иҳәеит Федотов.
Федотов иазгәеиҭеит ацәыргақәҵа аҳәаақәа ирҭагӡаны ишымҩаԥгаз алекциақәа, иреиҳаӡоу аҵарадыррақәа рҵаратә программақәа рӡыргара.
Аусҳәарҭабжьаратә ҵаратә цәыргақәҵа рҽаладырхәырц Аԥсныҟа иааит Державин ихьӡ зху Тамбовтәи ауниверситет, Ҟәбантәи аҳәынҭқарартә университет, Пирогов ихьӡ зху амедицинатә Университет, Санкт-Петербургтәи атехнологиақәеи адизаини руниверситет назлоу 12 ҵараиурҭа. Ацәыргақәҵа хақәкыс иамоуп иреиҳау аҵарадырра аусхк аҿы аихьӡарақәа раарԥшреи урыстәылатәи арҵаратә программақәа ауаажәларра радԥхьалара.