АҞӘА, абҵара 4 – Sputnik. Гал аӡы аиураз иалагалаз аамҭеихша аԥыхуп, ақалақь аҟны аӡы зегьы ироуеит ҳәа "Гал-Медиа" иазеиҭеиҳәеит араион ӡыла аиқәыршәареи аӡымҩахгагеи рмаҵзура аиҳабы Кахабер Изориа.
Абҵара 4 руха илеиз ақәа Галтәи аӡеизакырҭа арҭәит Гал ақалақь аӡы аиуртә еиԥш.
Аамҭала ахәыҷбаҳчақәеи Араионтә хәшәтәырҭеи аамҭеихшала аӡы арыҭара аларгалеит абҵара 3 рзы. Аӡы роуан ахәыҷбаҳчақәеи Араионтә хәшәтәырҭеи, убри аан Шьашьикәара ақыҭан аӡы ааныркылон. Ахәылбаҽха ақыҭа аӡы рырҭон, ақалақь аҟны иааныркылон.
Уаанӡа араион ахада актәи ихаҭыԥуаҩ Дмитри Адлеиба иҳәахьан иажәхьоу аӡымҩангагатә цәаҳәақәа ирыхьҟьаны, аҵыхәантәи ҩымз раахыс ақалақь аҟны лассы-ласс аӡы шааныркылоз.
Жьҭаарамзазы аӡымҩангагатә цәаҳәа хадаҟны аиҭашьақәыргыларатә ус дуқәа мҩаԥган, аӡымҩангагатә цәаҳәақәа ахьырԥсахыз рацәоуп.