АҞӘА, абҵара 7 - Sputnik. Аԥсны ахада Аслан Бжьаниа Гагра араион Алаҳаӡы ақыҭан имҩаԥысуа аерман культуреи абзазареи рфестиваль "Амшен" иҽалаирхәит. Абри атәы аанацҳауеит ахада ипресс-маҵзура.
"Аҭоурыхтә мзызқәа ирхырҟьаны ҳара иаку жәларык реиԥш ҳаҟоуп, ҳбызшәа, ҳкультура, ҳдинхаҵара рҷыдарақәа ирыхьмырԥшыкәа, ҳара зегьы Аԥсны Аҳәынҭқарра ҳатәылауаауп, иаку аҭоурыхи иаку алахьынҵеи ҳаидыркылоит", - иҳәеит иара.
Аслан Бжьаниа инаҵшьны иазгәеиҭеит ареспубликаҿы аус шыруа аерман школқәа, урҭ атәыла акультура аҿиараҿ рлагала шдуу.
Иара убасгьы иҳәеит "Аԥсны Аҳәынҭқарра зҽаԥсазтәыз арҵаҩы" ҳәа ахьӡ шрыхҵоу Мархьаултәи ашкол адиректор Ева Кеиан, Амжәықәхәатәи ашкол аиҵбыратә классқәа рырҵаҩы Вартуш Хамалиан, Иашҭхәатәи ашкол №2 афизика арҵаҩы Феликс Џьидариан.
Аԥсны инхо аерманцәа традициала имҩаԥырго аҽаҩра аныҳәа мҩаԥысит абҵара 7 азы Алаҳаӡы ақыҭаҿ. Арахь иааиит аерман уаԥшь ахаҭарнакцәа, асасцәа. Ауснагӡатә рхы аладырхәит ахада ихаҭыԥуаҩ Бадра Гәынба, ахада Иусбарҭа анапхгаҩы Абесалом Кәарҷиа, аԥыза-министр актәи ихаҭыԥуаҩ Џьансыхә Нанба, Аминистрцәа реилазаара ахаҭарнакцәа, адепутатцәа.