АҞӘА, абҵара 10 – Sputnik. Ареспубликатә психиатриатә хәышәтәырҭа асанитартә еибаркырақәа шьаҭанкыла ирҽеихоит, абри атәы аанацҳауеит Аԥсны агәабзиарахьчара аминистрра апресс-маҵзура.
Аусбарҭа аиҳабы Ирма Ануаԥҳа лажәақәа рыла, ацрыҵцарҭақәа ишахәҭоу еиԥш аус ахьырымуа ачымазцәеи амедусҳәарҭа аусзуҩцәеи рзы иманшәалам, атрубақәа аӡы ахьрыцәцо иахҟьаны ауадақәа аԥхасҭа рыҭоуп.
Аусурақәа ирзоужьуп 3,74 миллион мааҭ. Анардадаҩ ԥшь-еихагылак иҟоу ахыбраҿы атрубақәеи асантехникеи иԥсахроуп, аҽыкәабарҭақәа рҿы ахаҳәҟьаԥс ықәиҵароуп, алашара неигароуп.