АҞӘА, абҵара 10 - Sputnik, Бадраҟ Аҩӡба. Аԥсуа милициа аԥҵоижьҭеи 102-шықәса аҵра азгәарҭеит Аҟәа.
Аусбарҭа анапхгареи аусзуҩцәеи Аԥсны Аџьынџьтәылатә еибашьраан иҭахаз рколлегацәа ргәаладыршәеит, АҩАР ахыбра ашҭаҿы игылоу абаҟа аҿаԥхьа ашәҭшьыҵәрақәа шьҭарҵеит.
"Иахьа шәара реиҳа аҵакы змоу аус нашәыгӡоит – ишәыхьчоит ҳтәылауаа ршәарҭадареи азинеиҿкаареи. Хаҭа-хаҭала ҳажәлари ҳтәылеи рлахьынҵа шәнапы иануп. Имариам иахьатәи аамҭақәа рзы шәнапынҵақәа ламысцқьала, ҭакԥхықәрала шәрызнеиуеит", - иҳәеит Аҩнуҵҟатәи аусқәа рминистр Роберт Кьиут.
Азинхьчаратә усбарҭа ахада АҩАР аусзуҩцәа ирзеиӷьеишьеит ԥхьаҟагьы ақәҿиарақәа рнапы злаку аус аҿы.
Амилициа аусзуҩцәа аҳаҭыртә хьӡы ҷыдақәа ранаршьеит. Уи ашьҭахь Ахьӡ-аԥша апарк аҟны ашәҭқәа шьҭарҵеит.