АҞӘА, абҵара 17 - Sputnik. 2023 шықәсазы анхарҭатә программа аҳәаақәа ирҭагӡаны 67 ҭаацәара ацхыраара роураны иҟоуп, абри атәы арадио Sputnik аефир аҿы еиҭеиҳәеит Аԥсны Асоциалтә еиқәыршәареи адемографиатә политикеи рминистрра азинтә ҟәша аиҳабы Ромео Черқьезиа.
Актәи аетап ԥхынгәымзазы ихыркәшахеит. 67-ҩык азыҳәаҟаҵаҩцәа асертификатқәа рыҭан.
Абри ашьҭахь апрограмма алахәылацәа анхарҭақәа рыԥшаара иалагеит. 30 ҭаацәара иахьатәи аамҭазы иахьынхаша аҭыԥ аархәеит.
2023 шықәсазтәи анхарҭатә программа ала иазыԥхьагәаҭаз 60 миллион мааҭ рҟынтәи ахархәара аиухьеит 38,6 миллион мааҭ.
"Арҭ аԥарақәа рҟынтәи анхарҭақәа аархәахьеит, егьырҭ макьана аԥшаара иаҿуп", - иҳәеит Черқьезиа.
Сынтәа анхарҭа ззаамхәаз ҽааны иааихәар ҟалоит, аамҭалатәи аԥкырақәа апрограммаҿ иазгәаҭаӡам.
Аԥсны Асцоиалтә еиқәыршәареи адемографиатә политикеи рминистрра азинтә ҟәша аиҳабы иара убасгьы иазгәеиҭеит 2021 шықәса раахыс 25-ҩык азыҳәаҟаҵаҩцәа макьанагьы иахьынхаша ишашьҭо.
Аԥсны ахада иусԥҟала 2021 шықәсазы ишьақәырӷәӷәан аҳәынҭпрограмма Аԥсны социалла ихьчам ауааԥсыра анхарҭаҭыԥқәа раахәаразы хықәкыла ацхыраара рыҭара. Апрограмма аԥҟарақәа инарықәыршәаны арзаҳал алазҵаз аҭаацәара анхарҭа аахәараз 500 нызқьмааҭи аҭаацәараҿы иҟоу рыцԥхьаӡа 100-100 нызқьмааҭи рзыршәоит. Иааизакны 1,2 миллион мааҭ артәоит.