АҞӘА, абҵара 22 – Sputnik, Бадраҟ Аҩӡба. Аԥсны Ауаажәларратә палатаҿы иҟаз аилатәараҿы ақыҭанхамҩа аминистр Беслан Џьопуа Аӡҩыбжьа ақыҭаҿы идыргыло аусеиҭадуларатә наплакы далацәажәеит.
Апроект рнапы алакуп Аԥсны атәылауаа, уажәазы анаплакыҩцәа акредитиура азҵаара рыӡбоит ҳәа иҳәеит иара. Џьопуа иажәақәа рыла, анаплакы иаиуеит алшара шықәсык аҩнуҵҟа 25 000 тонна ашәыри ауҭраҭыхи аусеиҭарыдулара.
"Арахь ацитрусқәа рыдагьы Аԥсны изызҳауа ашәырқәеи ирааӡо ауҭраҭыхқәеи аҵанакуеит. Аӡыхааи аконцентратқәеи рыдагьы аԥстәы, аԥсаатә, аԥсыӡ рзы афатәааглыхра алыршахоит", - ҳәа иҳәеит аминистр.
Аусеиҭадуларатә наплакы ҟалар, уи ақыҭанхамҩа знапы алаку рзы ихәарҭахоит.
"Анхацәа, ахаҭабзиара усҟак иҳаракым ҳәа абжьааԥны икарыжьуа аалыҵ арахь иааргалоит, иара иақәнагахаша ахәԥсагьы роуеит", - ҳәа иҳәеит Џьопуа.
Аминистр иҳәеит анаплакы шықәсык аҩнуҵҟа 25 000 тонна ашәыри ауҭраҭыхи аусеиҭарыдулараз алшара аиуеит ҳәа.