АҞӘА, абҵара 22 - Sputnik. Бзыԥтәи аиҩхаа абнараҿы амаининг-ферма ду ԥшаауп ҳәа аанацҳауеит Аԥсны АҩАр апресс-маҵзура.
170 аппарат, ззеиԥшмчхара 400 киловатт иҟоу аферма, рхатәуп Руслан Ҷолариеи Гьаргь Гобечиеи. Дара рганахьала административтә зинеилагаразы аԥкаанҵақәа азырхиоуп.
Иара убасгьы ареид амҩаԥгараан иԥшаауп 43 аппарат (рзеиԥшмчхара 86 киловатт) Лыхны ақыҭан, ахатәтәҩы - Тристан Гәыблиа.
Аҟәа, аоперштаб аусура аҳәаақәа ирҭагӡаны, иаркуп Арӡынба имҩаҿ иҟаз амаининг-хархәагақәа рремонт ахьыҟарҵоз аҟазарҭа. Уантәи иқәгоуп 14 аппарати 69 блоки.
Даҽа 8 аппаратк, Евгени Чачибаиа иитәыз, аарԥшуп Аҟәа, Дбар имҩаҿы. Аобиектқәа зегьы аркуп. Ахархәагақәа рылгоуп.