АҞӘА, абҵара 24 – Sputnik, Асмаҭ Ҵәыџьԥҳа. 2023 шықәса ажьырныҳәамза инаркны жьҭаарамзанӡа Гал араион аҟны иныхыз афымцамч 69,5 миллион киловатт-сааҭ ыҟоуп, 11 миллион еиҵоуп 2022 шықәса аасҭа, абри атәы Sputnik иазеиҭеиҳәеит "Амшынеиқәафымцамч" араион аҟәша аиҳабы Ниаз Џьергениа.
Иара идыррақәа рыла, 2019 шықәсазы араион аҟны иныхын 75 миллион киловатт-сааҭ афымцалашара.
Акриптавалиута арҳара аԥырҟәҟәара инамаданы Гал араион ахада Константин Ԥлиа аилацәажәара мҩамигеит.
Џьергениа иазгәеиҭеит, афымцалашара имаҷны ахархәара шалыршахаз араион аҟны аԥхьаӡагақәа рықәыргылара.Ԥхынгәымза инаркны жьҭаарамзанӡа Гали Шьашьикәара ақыҭеи 38 станциа еиҵақәа рыҟны иқәыргылан аԥхьаӡагақәа 2984 цыра.
Жьырныҳәамза инаркны жьҭаарамзанӡа араион аҟны аиурист хаҿқәа 6,5 миллион мааҭ рыхә афымцалашара нырхит, урҭ рахьынтәи ф-миллионк инарзынаԥшуа ишәоуп. Ауаҩытәыҩсатә хаҿқәа 77 миллион мааҭ рыхә афымцалашара ахархәара амоуп, 20 миллион мааҭ ршәахьеит.
Гал араион ахада Константин Ԥлиа иҳәеит, Гал амаининг-ферма дуқәа рыҟамзаара ишабзоуроу афымцалашара ахархәара амаҷхара. Аха убри аан амаининг хархәагақәа шыҟоу, рхыԥхьаӡара маҷны.
Ԥлиа иазгәеиҭеит, араион ақыҭақәа рхадацәа рнапы ишаниҵаз мчыбжьык иалагӡаны амаининг хархәагақәа рзы аҳасабырба еиқәдыршәарц.