АҞӘА, абҵара 25 - Sputnik. Урыстәылауаҩԥҳәыски Ҭаџьықьысҭан атәылауаа ҩыџьеи ааныркылеит анаркотик рацәаны иаладырҵәон ҳәа гәҩарас иҟаҵаны ҳәа аанацҳауеит Аԥсны Аҩнуҵҟатәи аусқәа рминистрра апресс-маҵзура.
Ашьаусԥшаара ишаҳәо ала, Хусраф Исоев Наврусџьон Сафарови Ангелина Мавсумовеи драцәажәаны аметадон еицаархәеит, ирҵәахит, нас имҩаныргеит Аԥсны иаладырҵәарц азы. Анаркотикқәа дара иаархәеит ахьыӡҷыда "Рома Босс" ҳәа змоу абжьыгаҩ иҟны, анаҩс урҭ Пицунда аҭыԥ маӡақәа рҿы ишьҭарҵон.
Дара ари аус ишаҿыз иааныркылеит. Сафаров имырхит аметадон згәылаз 22 еилаҳәара. Аҭыԥ маӡақәа рҿы даҽа ф-еилаҳәарак рбеит.
Исоев идырбалеит 11 еилаҳәара, Пицунда абнараҿы х-еилаҳәарак рбеит. Мавсумова илыдырбалеит аметадон згәылаз аа-еилаҳәарак, аҭыԥ маӡақәа рҿы - хәба.
Иааныркылаз ирыдырбалаз анаркотик азеиԥш капан 62 грамм иҟоуп.
Ашьаус хацыркуп, Гагратәи араионтә ӡбарҭа ишаӡбаз ала, дара ырбаандаҩуп.