АҞӘА, абҵара 26 – Sputnik, Сариа Кәарцхьиаԥҳа. Фазиль Искандер ихьӡ зху Аурыс драматә театра аҟны асабша, абҵара 25 рзы ихыркәшахеит арежиссиортә лабораториа "Сандро".
Апроект алахәхаразы иааԥхьан урыстәылатәи арежиссиор қәыԥшцәа хҩык. Хымш рыла РУСДРАМ актиорцәеи дареи Фазиль Искандер иҩымҭақәа ирылхны, аԥхьаҟатәи аспектакль аескиз аздырхиар акәын.
Урыстәылатәи арежиссиор Олесиа Невмержицкаиа иалылхит "Ахьча Махаз". Урыстәылантәи иааз Игор Лебедев "Ажьабаӷьқәеи арқьымаҭқәеи" аҩымҭа иалхны иқәиргылеит аескиз. Василиос Самуркас - "Харлампои Деспинеи" ажәабжь ала.
Абҵара 25 рзы аусумҭақәа рыхԥагьы ахәаԥшцәеи аексперттә хеилаки идырбан. Ахәаԥшцәеи аекспертцәеи рыбжьыҭара алҵшәақәа рыла, аиааира зго аескиз 2024 шықәсазы ихаҭәаау аспектакль алхны ахәаԥшцәа ирыдгалахоит.
Арежиссиортә лабораториа "Сандро" Фазиль Искандер диижьҭеи 95 шықәса аҵра иазкуп. Апроект адгылара анаҭеит атеатр аофициалтә партниор аилахәыра "А-Мобаил".