АҞӘА, ԥхынҷкәын 2 – Sputnik. Аԥснытәи абитуриентцәа Урыстәылатәи аҵараиурҭақәа рҭаларазы ашәҟәқәа рыдкылара аҿҳәара иацҵоуп, абри атәы аанацҳауеит аквотақәа рзы Россотрудничество аофициалтә канал.
"Зышәҟәқәа ргәаҭаразы урыстәылатәи ацҳаражәҳәарҭеи аконсультсвеи рахь анашьҭра иахьымӡаз аԥснытәи абитуриентцәа рзы ԥхынҷкәын 15 рҟынӡа аҿҳәара инахоуп",- азгәаҭоуп адырраҭараҿы.
Цәыббра 1 инаркны ихацдыркит 2024-2025 шықәсазы Урыстәылатәи аҵараиурҭақәа рҭалараз аквотатә программа. Сынтәа Аԥсны иазоужьуп 110 квота.
Еиҳаны аквотақәа рзоужьуп арҿиаратә занааҭқәа – 20, амедицина – 12, 10-10 квота рзырхоуп: аелектроника, арадиотехника, аимадаратә система, амашьынаргылара, акомпиутертәии аинформациатәии ҵара.
Ԥхьаҟатәи астудентцәа ирылшоит рдокументқәа нарышьҭыр аҵараиурҭақәа фба рахь. Абитуриент акы инеиҳаны аҵараиурҭахь дрыдыркылар, ихала иалихуеит еиҳа ииҭаху. Адокументқәа рыдкылара анхыркәшахалак ашьҭахь иҳәаақәырҵоит адистанциатә ԥышәара амҩаԥгара арыцхә. Аԥышәара алҵшәала ишьақәырӷәӷәахоит аҭаларалшаратә балл.