АҞӘА, ԥхынҷкәын 4 - Sputnik. Очамчыра араион Гәыԥ ақыҭан иҟалаз амцакра иахҟьаны ахаҵа дҭахеит ҳәа Аԥсны АҶА адырра рыҭан.
Амҽыша, ԥхынҷкәын 3 рзы Гәыԥ ақыҭан ҩбаны еихагылаз ахатәыҩны блит. Абылра шыҟалаз азы АҶА ашҟа адырра ҟалеит асааҭ 14:37 рзы.
"Амцарцәаҩцәа аҭыԥахь ианнеи аамҭазы аҩны аҩбатәи аихагылеи иаҿаԥшьыз ауадеи амца ахыҵәахьан", - ҳәа азгәарҭеит аусбарҭаҟны.
Амца дырцәон Очамчыреи Ткәарчали рраионқәа рҟынтәи амцарцәара-аиқәырхаратә гәыԥқәа ҩба.
Абылра иахҟьаны дҭахеит 22-шықәса зхыҵуаз ахаҵа. Абылра зыхҟьаз ҭырҵаауеит.