АҞӘА, ԥхынҷкәын 5 - Sputnik. Гәдоуҭа араион Приморск ақыҭан анаркотикқәа анышьҭеиҵуаз аамҭаз дааныркылеит Москватәи аобласт аҟны инхо Свиатослав Огариов ҳәа аанацҳауеит Аԥсны Аҩнуҵҟатәи аусқәа рминистрра апресс-маҵзура.
Иара амилициа аусзуҩцәа дырҿагылеит. Хаҭала игәаҭараан идырбалеит 15 еилаҳәара аметадон.
Огариов анаркотикқәа ааихәеит анаркоканал "Кира" ала, анаҩс Аԥсны амаӡа шьҭаҵарҭақәа рыла аҭиразы.
Иааидкыланы Огариов имхуп 14,377 грамм анаркотик. Ашьаус хацыркуп, иара даанкылоуп.