АҞӘА, ԥхынҷкәын 7 - Sputnik, Асмаҭ Ҵәыџьԥҳа. Апарламент адепутатцәа актәи аԥхьарала ирыдыркылеит Ауаажәларратә палата аусура ҳәаақәызҵо закәанԥҵаратә актқәак рахь ариашарақәа.
Адокумент инақәыршәаны Апалата алахәылацәа рзы ақәратә ценз 25 шықәса ҳәа ишьақәыргылахар ҟалоит.
Иара убасгьы Апалата иалахәхар ҟалом арыжәтә зжәуа, анаркотик ҟазҵо, апсихика чымазара змоу, аполитикатә партиақәеи аидгылақәеи рлахәылацәа.
Иазԥхьагәаҭоуп Апалата лахәылацәас амчра азакәанԥҵаратә хәҭа ахаҭарнакцәа ралагалара. Уажәы аус зуа азакәан аҿы Апалата аусура иалахәуп амчра анагӡаратә хәҭа, аҭыԥантәи ахаланапхгараҭаратә усбарҭақәа, аграждантә еилазаара рхаҭарнакцәа, аха иҟам амчра азакәанԥҵаратә хәҭа ахаҭарнакцәа.
Иара убасгьы еиҭакхар ҟалоит араионқәеи ақалақьқәеи рахьынтә Апалата алахәыларазы ахаҿқәа рықәыргылара. Ариашарақәа инарықәыршәаны, акандидатурақәа ықәдыргылалоит аҭыԥантәи ахаланапхгараҭаратә усбарҭақәа.
Ауаажәларратә палата аиҿкаашьа апринципқәа реиҭакра адагьы азакәан апроект иазԥхьагәанаҭоит аграждантә еилазаареи анагӡаратә, азакәанԥҵаратә, аӡбаратә системақәеи рдиалог азы Ауаажәларратә палата еилацәажәарҭаны иҟаларцаз азин.