АҞӘА, ԥхынҷкәын 12 - Sputnik. Аԥсны ауаҩы изинқәа рыхьчаҩ Анас Кьышьмариаԥҳа Апрокурор хада, АҩА рминистр, Гал араион апрокурор, Гал араион АҩАР аиҳабы рахь ашәҟәы налышьҭит араион аҟны инхоз Витали Карбаиа иԥсҭазаара иалҵра зыхҟьаз ҭырҵаарц.
Асоциалтә ҳақәа рҿы ԥхынҷкәын 10 рзы атәылауаҩ Карбаиа иԥсҭазаара далҵит азинхьчаратә усбарҭақәа русзуҩцәа ирыхҟьаны ҳәа аинформациа цәырҵит.
Анаҩс "Гал-Медиа" аредакциа Аԥсны АҩАР апресс-маҵзурахьы аофициалтә хҳәаазы азыҳәа нанашьҭит.
Аусбарҭаҿы ишазгәарҭо ала, ԥхынҷкәын 6 рзы араионтә милициа аҷаԥшьарҭахьы аҭел иасны ирҳәеит, Гал аџьармыкьаҿы арыжәтә ыжәны иҟаз ахаҵа ихы бааԥсны имҩаԥигоит ҳәа. Ас зхы мҩаԥызгоз, Тҟәарчал араион Ҵарча ақыҭа инхо Витали Карбаиа, Гал араион АҩАР ахь днаргеит. Ԥхынҷкәын 7 рзы ашьыжь доурыжьит.
"Иҟоу аинформациала ԥхынҷкәын 8 рзы Галтәи араионтә хәышәтәырҭаҟынтәи Аҟәа, ареспубликатә хәышәтәырҭахь инагаз Карбаиа В.И. 09.12.2023 шықәсазы иԥсҭазаара далҵит",- аҳәоит аусбарҭа ахҳәааҿы.
Карбаиа иԥсҭазаара иалҵра зыхҟьаз аҭҵааразы ашьаусԥшаарақәа мҩаԥыргоит, ҳәа азгәарҭеит АҩА апресс-маҵзураҿы.