Урыстәыла Аҳаирмчқәа рвертолиотқәа ҩба – Ми-8 амацәаз иҭакыз Тҟәарчал иалганы Гәдоуҭаҟа ахҵәацәа ргон агуманитартә реис аҳасабала.
Асааҭ 17:30 рзы, ианыҵԥраа ашьҭахь 12 минуҭ ааҵуаны, Лаҭа ақыҭа ианахаԥраауаз 1900 метра аҳаракыраҿы иҟаз, "03" ҳәа иарбаз авертолиотқәа руак ақырҭуа мпыҵахалаҩцәа ракетала иеихсны икарыжьит. Аракета ҭырҟьан Қырҭтәыла Аҳәынҭсовет ар ирымпыҵакыз аҵакыраҟынтә.
Авертолиот каҳаит Гәылрыԥшь араион Лаҭа ақыҭан.
Авертолиот иҭатәаз 87-ҩык апассаџьырцәа зегьы ҭаблит. Урҭ рыбжьара иҟан 35-ҩык ахәыҷқәеи ааҩык зцәазтәымыз аҳәсеи.
Авертолиот иҭан Владимир Анцупови Аслан Занҭариеи назлаз жәаҩаҩык аибашьцәа – еицырдыруаз аԥсуа командирцәа, Аԥсны Афырхацәа.
Иҭахаз рыԥсыбаҩқәа мчыбжьык ааҵуаны Осман Гәынба ихьӡ зху Гәдоуҭа апарк аҿы анышә иамардеит. Есышықәса ари аҭыԥ ахь иааиуеит ашәҭшьыҵәрақәа шьҭарҵаразы, ажәҩан иалаблыз ргәаладыршәаразы Аԥсны анапхгареи ауааԥсыреи.