АҞӘА, ԥхынҷкәын 18 - Sputnik. Урыстәыла АШәМ аусзуҩцәа Ижевск ақалақь аҿы дааныркылеит атеракт еиҿызкаауаз 33 шықәса зхыҵуа урыстәылауаҩ. Абри атәы аанацҳауеит РИА Новости, аусбарҭа апресс-маҵзура адыррақәа шьаҭас иганы.
Иазгәаҭоуп, иааныркылаз ахаҿы украинатәи аԥшыхәра адҵала атәылахьчаратә наплакык аиҳабы дишьырц иҭахын, уи азы ахалаҟаҵаратә бомба ԥижәарц игәы иҭан.
"Иааныркылаз ахаҵа имхуп иԥжәо ахалаҟаҵаратә маруга аҟаҵаразы иаҭаху амаҭәахәқәеи арԥжәагатә маҭәашьарқәеи, иара убас имырхит украинатәи ацәгьоуцәа рыҽзларымеидоз ахархәагақәагьы", - ҳәа ануп адырраҭараҿы.
Ашьаус хацыркуп ахәҭаҷқәа "Атеррористтә акт аҽазыҟаҵара", "Атеррористтә еиҿкаара аусура алахәра" рыла, иаанкылоу ахаҿы 20 шықәсанӡа абахҭаҿ аҭакра иқәшәар ҟалоит.