АҞӘА, ԥхынҷкәын 19 – Sputnik, Асмаҭ Ҵәыџьԥҳа. Асахьаҭыхыҩ Руслан Габлиа иусумҭа атриптих "Анатиурморт" 2023 шықәсазы иранаршьоз аҳәынҭқарратә премиа "Ашықәс иреиӷьу аусумҭа" аҿы аиааира агеит.
Аҩбатәи аҭыԥ агеит Амиран Адлеиба Сариа Лакоба илызку искульптура "Агәхьаа", ахԥатәи – Диана Хынҭәԥҳа лусумҭа "Агаҿа".
Уи адагьы акультура аминистрра аҳаҭыр шәҟәқәа роуит асахьаҭыхыҩцәа Илиа Ҵәыџьбеи Апшьа Ҳагԥҳаи.
Ацәыргақәҵатә зал хада адиректор Ельвира Арсалиаԥҳа илҳәеит 2023 шықәсазы ишеиҿкааз 25 цәыргақәҵа.
"Сгәыӷуеит, ҳҭааҩцәа ирыман алшара еиҳа ргәы иақәшәоз аусумҭақәа ралкаара. Ҳгәы иаанагоит, ҳаамҭазтәи аҟазара шәҳардыруеит ҳәа. Иааиуа ашықәсгьы ҳагәҭакқәа рынагӡаразы еинҭәыланы иҟалап ҳәа сеигәыӷуеит", - лҳәеит лара.
Асахьаҭыхыҩцәа реидгыла ахантәаҩы Витали Џьниа иҳәеит иаиааиз шалыркаауаз маӡалатәи абжьыҭирала. Актәи аҭыԥ иоуит еиҳа абжьы зауз асахьаҭыхыҩ.
Аҳәынҭқарратә премиа аиуразы аконкурс 2001 шықәсазы иаԥҵан. Есышықәса, аҳәынҭқарратә комиссиа, аконкурс амҩаԥгара аԥҟарақәа инарықәыршәаны, хҩык аиааира згаз ралкаара мҩаԥнагоит асахьа, аскульптура, аҿыханҵа усумҭақәа рыла.