АҞӘА, ԥхынҷкәын 21 - Sputnik. Апрокуратура хада ААИ амаҵзурауаа румҭақәа рҿы аилагарақәа аадырԥшит арыжәтә ыжәны ма анаркотикқәа зыдкыланы иҟаз амашьынарныҟәцаҩцәа административтә ҭакԥхықәра раҵаркра аус аҟны. Абри атәы аанацҳауеит Апрокуратура хада апресс-маҵзура.
Иазгәаҭоуп арыжәтә ыжәны ма анаркотикқәа зыдкыланы иҟаз амашьынарныҟәцаҩцәа административтә ҭакԥхықәра раҵаркразы ишьаҭаны иҟазар шакәу алкотестер аҿы ргәаҭара ма амедицинатә гәаҭара ашәҟәынҵа.
Ҭагылазаашьақәак раан азин еилаган – ма агәаҭара алҵшәақәа ыҟамызт, ма ахархәара змаз атехникатә мыруга аметрологиатә гәаҭара аҭахрақәа ирықәшәомызт.
"Иара убасгьы агәаҭараан ишьақәыргылан ахҭыс – арыжәтә ыжәны, ма анаркотикатә маҭәашьар зыдкыланы амашьына аԥсҟы еиҭазкыз ауаҩы административтә ҭакԥхықәра идҵан "Административтә зинеилагарақәа русқәа рзы аусеилыргаразы" ахәҭаҷ 119 ахәҭа 1 инақәыршәаны, убри аан иара даҵаркызар акәын азакәан 115-тәи ахәҭаҷ 5-тәи ахәҭа 15 мшы административтә ҭакреи шықәсык атранспорт хархәага арныҟәара азин амхреи", - ҳәа аанацҳауеит апресс-маҵзура.
Апрокуратура хада агәаҭара алҵшәақәа рыла Аԥсны АҩАР ААИ ахь инанашьҭит 35 қәшаҳаҭымхара, аминистр изынанашьҭит иаарԥшыз аилагарақәа рҭыԥ иқәиҵарц, урҭ зхароу аҭакԥхықәра иаҵаиргыларц азы азԥхьанага.