АҞӘА, ԥхынҷкәын 27 - Sputnik. Аԥсны иҟоу Россотрудничество ахаҭарнакра Аҟәеи Гали рыҟны иаанартит иахьатәи аамҭа иақәшәо арҵаратә центр. Абри атәы аанацҳауеит Аурыс ҩны апресс-маҵзура.
Ацентрқәа еиқәыршәоуп атехника, аҩнымаҭәа ҿыц, арҵаратә литература, аметодикатә маҭәарқәа, апианино уҳәа рыла. Аурыс бызшәа аҵареи апрограмма аҿалархәреи рзы алшара рымоуп изҭаху зегьы аҳәыҷқәеи адуцәеи.
Раԥхьатәи аҭааҩцәа ацентр аартра ридиныҳәалеит Аурыс ҩны анапхгаҩы Дмитри Федотов.
"Сгәыӷуеит, ҳаԥхьаҟа "Здравствуй, Россия!" апрограмма шәахәҭакны шәҟалап, Урыстәыла шәаҭаап, анаҩс уи ара Аԥсны еиҭашәҳәап", - ҳәа иҳәеит иара.
Аурыс бызшәа ацхыраараз ацентрқәа рҳа Россотрудничество ихацнаркит 2023 шықәса абҵарамзазы. Ашықәс нҵәаанӡа адунеи 16 тәыла рыҟны иазгәаҭоуп 31 центр аартра.