АҞӘА, ԥхынҷкәын 27 - Sputnik. Аԥсны ахада Аслан Бжьаниа Аҳәынҭдача "Пицунда" аҵакыраҿ иҟоу аргыларақәа Урыстәыла аҭараз Аиқәшаҳаҭра шьақәирӷәӷәеит. Адокумент кьыԥхьуп атәыла ахада исаит аҟны.
"Аԥсны Аҳәынҭқарра аиҳабыреи Урыстәылатәи Афедерациа аиҳабыреи рыбжьара Аԥсны Аҳәынҭқарра аҵакыраҿы иҟоу аргыларақәа Урыстәылатәи Афедерациа ахатәразы аҭаразы 2022 шықәса ажьырныҳәа 19 рзы Москва анапы зҵаҩыз Аиқәшаҳаҭра шьақәырӷәӷәазааит", - ҳәа аҳәоит атекст аҿы.
Аԥсны Апарламент аҳәынҭқарратә дача "Пицунда" аҵакыраҿ иҟоу аргыларақәа Урыстәыла аҭареи ахарархәареи рзы Аиқәшаҳаҭра шьақәнарӷәӷәеит ԥхынҷкәын 27 рзы.
Абжьыҭараан асессиа иалахәыз 28-ҩык адепутатцәа рҟынтәи 26-ҩык аргылара рыҭара ишақәшаҳаҭу ала рыбжьы арҭеит.