АҞӘА, ԥхынҷкәын 28 - Sputnik. Аԥсны 20 нызқь тонна инареиҳаны амандарина алыргахьеит, абри атәы аанацҳауеит Краснодартәи атәылаҿацә аҳазалхырҭа Шәача ақалақь аҿтәи апресс-маҵзура.
Есыҽны ареспублика иалыргоит 700 тонна ацитрус-шәырқәа. Аҳазалхырҭатә хылаԥшра иахысуеит бжьаратәла 500 еидарамҩангага машьына.
Амандаринақәа рыҟагьы аҳәаа иахыргоит апельсинқәа - 112 тонна, алимонқәа - 531 тонна.
Лассы иԥхасҭахо аидара ҳәа иазыԥхьаӡаны ақыҭанхамҩаалыҵ ирццаку агәаҭара иахрыжьуеит.
Аԥсны ақыҭанхамҩа аминистрра азгәаҭақәа рыла, сынтәа ацитрусқәа рҽаҩра 30 000 тонна иҟалароуп.
Аҳазалхыҩцәа ишьақәыргылоу азинҟамҵарақәеи аԥкырақәеи реилагарақәа азгәарҭоит. 100 инареиҳаны административтә зинеилагара азгәарҭахьеит.