АҞӘА, ԥхынҷкәын 29 - Sputnik. Аԥыза-министр актәи ихаҭыԥуаҩ Џьансыхә Нанба Аԥсны аенергетикеи атранспорти рминистрс дҟаҵоуп, абри атәы аанацҳауеит атәыла ахада ипресс-маҵзура.
Аусԥҟа инапы аҵеиҩит Аслан Бжьаниа.
Цәыббрамзазы Аԥсны ахада Иусбарҭа аиҳабы Џьансыхә Нанба имаҵура ааныжьны, Аԥсны аԥыза-министр актәи ихаҭыԥуаҩс дҟаҵан.
Џьансыхә Нанба аԥыза-министр ихаҭыԥуаҩс, афинансқәа рминистрс, Аԥсны ашәахтәқәеи аизгатәқәеи рзы рминистрс, Аԥсны Аҳәынҭқарра аԥараҵәахырҭа Аусбарҭа аиҳабыс дыҟан. Мшаԥымза 2020 инаркны лаҵарамза 2021 шықәсанӡа Џьансыхә Нанба Аԥсны ахада Иусбарҭа аиҳабы ихаҭыԥуаҩс аус иуан. 2022 шықәса нанҳәамза инаркны 2023 шықәса цәыббрамзанӡа Џьансыхә Нанба напхгара аиҭон атәыла ахада Иусбарҭа.