АҞӘА, ԥхынҷкәын 29 – Sputnik, Бадраҟ Аҩӡба. Аԥсны Аминистрцәа реилазаара ирыдыркылеит ақәҵара атәыла ахада идгалазарц ажәадгала: 2022-2025 шықәсқәа рзы Аԥсны асоциал-економикатә ҿиараз апрограмма анагӡаразы Аԥсни Урыстәылеи рыбжьара Аиқәшаҳаҭра аԥсахрақәа рылагаларазы.
"Аԥкаанҵа иазыԥхьагәанаҭоит 2024 шықәсазы аҳәынҭусбарҭақәа русзуҩцәа хаз иго ркатегориақәак рулафахәы ашьҭыхра", - лҳәеит аекономика аминистр Кристина Озган.
Аиҭакрақәа ирыҵаркуеит агәабзиарахьчара, аҵарадырра, аҭҵаарадырра, акультура, аспорт, асоциалтә маҵзура русхк аҟны аус зуа аҳәынҭусбарҭақәа русзуҩцәа рулафахәы ашьҭыхра.
азеиԥш ҵараусбарҭақәа рырҵаҩцәа - 29 671 мааҭ,
ашколқәранӡатәи аҵараиурҭақәа рырҵаҩцәа- 26 669 маат,
ахәыҷқәа рҵаразы иназацҵоу аҵҟараусбарҭа аусзуҩцәа- 29 172,
абжьаратә ҵараиурҭақәа рырҵаҩцәа- 29 641 мааҭ,
иреиҳау аҵараиурҭақәа рырҵаҩцәа- 54 835 мааҭ,
аҵарауаа- 58 315 мааҭ,
аҳақьымцәа- 52 915 мааҭ,
ибжьаратәу амедусзуҩцәа- 29 378 мааҭ.
2022-2025 шықәсқәа рзы Аԥсны асоциал-економикатә ҿиараз апрограмма аҳәаақәа ирҭагӡаны ишьақәырӷәӷәан ахықәкытә ҵакқәа. Аицԥаразоужьразы аиҳабырабжьаратә еиқәшаҳаҭра аҳәааәқа ирҭагӡаны урыстәылатәи аган арбага ҿыцқәа шьақәнарӷәӷәеит ҳәа лҳәеит аминистр.