АҞӘА, ԥхынҷкәын 31 - Sputnik. Украина Арбџьармчқәа Белгород иахьалахысыз иахҟьаны иҭахахьеит 24-ҩык ауааԥсыра, абри азы аҳәамҭа ҟаиҵеит и-Telegram-канал аҿы агубернатор Виачеслав Гладков.
"Аӡбарҭатә медекспертцәа иазгәарҭеит иҭахаз руаӡәк еиҭа дхәыҷуп. Даҽаӡәы ахәышәтәырҭаҿы дыԥсит, ихдырраҿы дмааиӡакәа", — ҳәа иҩит иара 8:30 рзы.
Даҽа 108-ҩык ахәрақәа роуит ҳәа иҩит агубернатор. Уи адагьы, ааха рыҭоуп аҩнеихагылақәа 37, 453 уаҭах, ахатәыҩнқәа хԥа, асоциалтә обиектқәа быжьба.
Украинатәи архәҭақәа Белгород агәы иалахысит иацы шьыбжьон. Урыстәыла ашьаусԥшааратә еилакы ашьаус хацнаркит ауаҩшьра, ауаҩшьразы аҽазышәара, гәҭакрала атәым мазара ақәхреи абжьыхреи рзы. Ақалақь аҿы аус руеит ашьаусԥшааҩцәа, аекспертцәа, акриминалистцәа, урҭ ахҭыс шыҟалаз ҭырҵаауеит.
Аусбарҭа иаанацҳаит Белгород комбинациала иҟаз харабӷьара Украинантәи иаарышьҭыз ахымца шажәырҵаз ҩ-ракетак "Ольха" ала, уи иагәылан адунеи аҿы изқәиҭым акассетатә џьаԥҳани Чехиа иҟаҵоу аицҭырҟьаратә снариадқәа "Vampire"-и. "Ольха", иара убас аснариадқәа рыхәҭак аҳауаҽацәыхьчаратә хархәагақәа икарыжьит, аха уеизгьы аракетатә снариадқәеи икарыжьыз аракетақәа ркассетатә хәҭақәеи ақалақь иалаҳаит.