Аԥсны

Қьырсаныҳәа иазку анцәаимҵаныҳәарақәа Аԥсны аус зуа ауахәамақәа зегьы рҿы имҩаԥгахоит

Аиашахаҵаратә қьырсианцәа ажьырныҳәа 7 рзы Қьырсаныҳәа азгәарҭоит.
Sputnik
АҞӘА, ажьырныҳәа 6 - Sputnik. Қьырсаныҳәа иазку анцәаимҵаныҳәарақәа Аԥсны аус зуа ауахәамақәа зегьы рҿы имҩаԥгахоит, абри атәы Sputnik акорреспондент илзеиҭеиҳәеит ажәырқьԥшьаҩы Давид (Гәазаа).
Қьырсаныҳәа иазку анцәаимҵаныҳәарақәа ирылагоит ажьырныҳәа 6 асааҭ 23:00 рзы, ихыркәшахоит-ажьырныҳәа 7 рзы, ашьыжь.
"Анцәаимҵаныҳәара аныҳәаҽны ихадоуп. Ахыркәшамҭаз ауаа рыгәнаҳақәа рхыхразы аҽрыцқьара мҩаԥгахоит",- иҳәеит Гәазаа.
Аиашахаҵаратә қьырсианцәа ажьырныҳәа 7 рзы Қьырсаныҳәа азгәарҭоит. Евангелиа излаҳәо ала, Аԥаимбар Вифлеемтәи ахьчацәа ирылеиҳәеит агәырӷьара ду шыҟалаз, ауаа реиқәырхаҩ Иаса Қьырса дышииз. Аиашахаҵаратә қьырсиантә мзар инақәыршәаны Қьырсачгара мҩаԥысуеит абҵара 27 инаркны ажьырныҳәа 6 рҟынӡа.
Аԥсны
Адунеи еихаӷәӷәа-еиҵаӷәӷәа ианыҟала: Қьырса аныҳәа ду аԥсуаа рҿы ишазгәарҭо