АҞӘА, ажьырныҳәа 10 - Sputnik. Аԥсны амшын аԥшаҳәаҿы асы рацәаны иауӡом иааиуа амшқәа рзы, ақәа леиуеит ауп, абри атәы лҳәеит Sputnik аинтервиу азҭаз Аԥсны Аекологиазы аҳәынҭеилакы аҳауагәаҭаҩ Диана Ҭраԥшьԥҳа.
Ажьырныҳәа 13-14 руха ақәабаа-сабаа леиуеит, аха ишьҭагылаӡом. Асы рацәаны иауеит аҳаракырақәеи ашьхареи рҿы ҳәа азгәалҭеит Ҭраԥшьԥҳа.
Лара лажәақәа рыла, иааиуа амшқәа рзы Аԥсны ишьақәгылоит иҳараку атмосфератә қәыӷәӷәара еиԥш, илаҟәу атмосфератә қәыӷәӷәарагьы.
Ажьырныҳәа 12 рзы, 13-14 рухеи Арктикантәи аҳауа хьшәашәа аауеит.
“Амш шәшьуеит, ақәа леиуеит, ашьхара иахьаԥну ақәаршыҩ, ҭыԥқәак рҿы ақәабаа-сабаа леиуеит. Аҳаракырақәеи ашьхареи рҿы асы рацәаны илеиуеит, ишьҭагылоит", - лҳәеит Ҭраԥшьԥҳа.
Лара ишылҳәаз ала, аҳауаԥхарра 0°С рҟынӡа илаҟәуеит, ианамух, +1°С - +6°С рҟынӡа ихалоит. Амшынӡы аҟәандара - +10°С. Аҳауа ацәаакыра - 60-90%. Амшын цәқәырԥоит 2-4 балл амч аманы. Аԥшаласра аҽаԥсахлоит - 3-8 метр секундк ала, зны-зынла - 12-17 метр секундк ала.