АҞӘА, ажьырныҳәа 18 – Sputnik, Бадраҟ Аҩӡба. Аԥснытәи Аҳәынҭқарратә аҿар ртеатр Александр Вампилов ипиеса иалхны аспектакль ҿыц – акомедиа "Аԥеиҳаб" азнархиоит.
Арежиссиор Наталиа Николаева Урыстәылантәи дааԥхьоуп. Лара уаанӡагьы ари атеатр аҟны аспектакль "Амбжьах лыбжьара" ықәларгылахьан.
"2028 шықәсазы ари атеатр аҿы– "Амбжьах лыбжьара" (Шекспир) ықәсыргылеит. Уи аахыс дареи сареи ҳаиҩызцәоуп, еснагь ҳаиныруеит. Аспектакльқәа анықәыргылатәымгьы Аԥсныҟа исыхоит. Аҵыхәтәантәи афымз рыҩнуҵҟа апиеса алҳхон, абри аматериал аҿы ҳаангылеит", - лҳәеит Николаева Sputnik аинтервиу аҭо.
Арежиссиор иазгәалҭеит апиеса автор Александр Вампилов – адунеи аҿы еицырдыруа классикуп, драматургуп ҳәа.
"Ари адраматургиа ахаҭабзиара ҳаракӡоуп. Ааҩык актиорцәа алахәуп. Ҩ-хәҭакны аҽазыҟаҵарақәа ҳарҿуп. Мызки бжаки ҵуеит шьҭа", - лҳәеит лара.
Аспектакль аԥсышәала иқәдыргылоит, аха аурыс режиссиор лзы уи уадаҩра аҵам, избанзар Аҿар ртеатр аус рыцылуеижьҭеи Наталиа Николаева аԥсшәа маҷк лҵахьеит.
"Инҭкааны зегь сзеилымкаауазаргьы исаҳауа аҵакы еилсыргоит, аматериал здыруеит. Урыс бызшәала ҳалацәажәоит, дасу ииҭаху иҳәоит", - лҳәоит арежиссиор.
Акомедиатә спектакль "Аԥеиҳаб" аԥсуа ҳәынҭқарратә драматә театр асценаҿы идырбахоит ажьырныҳәа 23 - 24 рзы.