АҞӘА, ажьырныҳәа 18 - Sputnik. Аԥсны ахада Аслан Бжьаниеи Евразиа ажәларқәа р-Ассамблиеиа ахада Андреи Белианинови агуманитартә усеицура иалацәажәеит, абри атәы аанацҳауеит ахада ипресс-маҵзура.
Аиԥылараҿы ирзааҭгылан аинтеграциатә процессқәа реиқәыршәара, ажәларқәа реизааиргәара рызҵаарақәа.
Хазы ирзааҭгылан ахәыҷқәа рыԥсшьареи ргәабзиара аиӷьтәреи рзы Аԥсны рыԥсшьара аиҿкаараз алшарақәа.
"Даара ишьахәхон Аԥсны ашықәс зегьы аҩнуҵҟа иааиԥмырҟьаӡакәа аус зуа алагер аиҿкаара, уи азы аҳауатә ҭагылазаашьақәагьы акыр иманшәалоуп", - иҳәеит Белианинов.
Ахада иҳәеит атәыла анапхгара аҭынчреи аҿиареи заԥшьгамҭақәа азырхио аиҿкаарақәа аус рыцура ишазыхио.
Белианинов иазгәеиҭеит Ассамблеиа евразиатәи аконтинент атәылақәеи ажәларқәеи рыбжьара аимадарақәа рырӷәӷәаразы ишьаҭаны ишыҟоу.
Евразиа ажәларқәа р-Ассамблиеиа ахада Андреи Белианинов
© Foto / Пресс-служба президента Абхазии
Аиԥылара далахәын Гал араион ахада Константин Ԥлиа.
Иеиҳабыратәым аиҿкаарақәа Жәларбжьаратәи реидгыла "Евразиа ажәларқәа р-Ассамблеа" аԥҵан лаҵара 27, 2017 шықәсазы. Евразиа ажәларқәа р-Ассамблиеиа иахықәкы хаданы иҟоуп евразиатәи ажәларқәа реидгыла ауаажәларратә интеграциатә модель аиҿкааразы ахатәхаҿқәеи аиурист хаҿқәеи реидкылара. Ассамблеиа ахеилак хада иалахәуп Евразиа атәылақәа 33 рҟынтәи еицырдыруа ауаажәларратә усзуҩцәа 144-ҩык.