АҞӘА, ажьырныҳәа 19 – Sputnik, Бадраҟ Аҩӡба. Аҟәа аҩбатәи ашкол артҟәацга аҵоуп ҳәа Аԥсны АҶА ашҟа адырра иҟаҵаз инамаданы аус зуаз акинологцәеи иазыҟаҵоу алақәеи арҭҟәацга рзымԥшааӡеит.
АҶА акинологцәа ашкол ахыбреи ашҭеи зегьы гәарҭеит.
"Уажәы ҩынтәуп ашкол артҟәацга аҵоуп ҳәа адырра ҳауеижьҭеи. Аԥсны АШәМ-и Аԥсны АҩАР-и ҳареи аԥшааратә усурақәа еицымҩаԥаагеит – ашкол аҩнуҵҟа, адәахьы, ахыб. Аҟазауаа ишырҳәаз ала ахәыҷқәа ашкол ахь рынашьҭра ҟалоит", - ҳәа иҳәеит Кәыҵниа.
Аминистр иҳәеит, асеиԥш иҟоу аумҭақәа рзы ахарадҵара дырӷәӷәаразы Апарламент ахь ашәҟәы нарышьҭырц ргәы ишҭоу.
"Ас еиԥш иҟоу ахҭыскәа рзы лассы-лассы аҭел ианаҳзасуа ҳәарада иаҳгәаԥхом. Амаҵзура ҷыдақәа ари аус напаларкыроуп. Урыстәыла ари аҩыза аумҭа атеракт иаваҟәалоны иршьоит. Ҳаргьы Апарламент ахь асеиԥш иҟоу аумҭақәа рзы ахарадҵара дырӷәӷәаразы ашәҟәы анашьҭра ҳагәы иҭоуп", - ҳәа иҳәеит АҶА аиҳабы.
Аҟәа аҩбатәи ашкол артҟәацга аҵоуп ҳәа Аԥсны АҶА ашҟа адырра ҟарҵеит ажьырныҳәа 19 рзы. Аҵаҩцәеи арҵаҩцәеи ашкол идәылҵит. Аҭыԥ аҟны аус руан иҷыдоу аусбарҭақәеи АҶА аусзуҩцәеи.