АҞӘА, ажьырныҳәа 21 - Sputnik. Аԥсны ахада Аслан Бжьаниа Апрокуратура хада адҵа риҭеит Аԥсны Асахьаҭыхыҩцәа реидгыла иатәу ахыбраҿы амцакра зыхҟьаз.
Аԥсны аҭагылазаашьа ҷыдақәа рзы аминистр Лев Кәыҵниа иажәақәа рыла, АҶА аҷаԥшьаҩ иахь адырра ҟалеит асааҭ 03:38 рзы. Амца дырцәон Аҟәа, Гәдоуҭа, Гәылрыԥшь, Очамчыра рымцарцәаратә гәыԥқәа 11, аха амца аанкылара анрылша асааҭ 7 рзоуп.
Аҩбатәи аихагылаҿы асахьақәа зегьы ахьыҵәахыз ишьҭан ԥшь-нызқь цыра рҟынӡа аԥсуа сахьаҭыхыҩцәа русумҭақәа, Александр Шервашиӡе-Чачба, Варвара Бубнова уҳәа ӡәырҩы ртәқәагьы налаҵаны. Урҭ зегьы реиҳарак амца иалаблит.