АҞӘА, ажьырныҳәа 22 - Sputnik. Аҟәа ахәҭак ӡыда иҟазаауеит ажьырныҳәа 26 рҟынӡа, абри атәы аанацҳауеит "Аӡыршьҭра".
Кьалашәыр аӡиас ашьҭыҵра иахҟьаны 500 мм зыгәҭаӡа иҟаз 20 метра аӡыҭгагатә цәаҳәа ԥжәеит.
Ӡыда иҟазаауеит Турбаза, Ӡыгәҭа ақыҭа, Ҷанба имҩа, Баслаҭа ақыҭа. Кәыдрытәи амҩаҟны игылоу аҩнеихагылақәа рахь аӡхалара уадаҩхоит.
Кьалашәыр аӡиас ашьҭыҵра иахҟьаны ӡыда иаанхаз ауааԥсыра аӡы рызнагахоит, абри атәы Sputnik иазеиҭеиҳәеит Аҟәа анхамҩатә усбарҭа аиҳабы Руслан Аҩӡба.