АҞӘА, ажьырныҳәа 22 - Sputnik. Аԥсны Амилаҭтә сахьатә галереиа иалаблыз аусумҭақәа рыхәҭак аелектронтә ахь ииаган, абри атәы Sputnik иазеиҭеиҳәеит адиректор Сурам Сақаниа.
Асахьақәа зегьы аелектронтә ахь ииагамызт, ҳархьымӡеит. Иҟоуп усумҭақәак асаит аҟны иҭаҳгалаз. Шаҟа цыра ыҟоу атәы сызҳәом, аха уи зынӡа имаҷӡоуп. Аза Аргәын, Боча Аџьынџьал рышәҟәқәа анеиқәҳаршәоз усумҭақәак аелектронтә ахь ииаҳгеит", - иҳәеит Сақаниа.
Аелектронтә ахь ииагаз асахьақәа агалереиа афонд хада иахыԥхьаӡалоуп иҳәеит иара.
"Афонд хада иахыԥхьаӡалан акомиссиеи, аусдырыҩцәа рыцхыраарала иаахәаз аусумҭақәа. Урҭ хәызмаӡам усумҭақәоуп- ахә мацаразы акәым, ишыҩуи аҵаки рыла. Зыхә ҳаракыз асахьақәа уадак аҟны иҵәахны иҳаман, уаҟа акәын Александра Чачба-Шервашиӡе иусумҭақәагьы ахьышьҭаз", - иҳәеит Сурам Сақаниа.
Сақаниа иажәақәа рыла, хара имгакәа Урыстәыла акультура аминистрра аусдырыҩцәа Аҟәаҟа иаараны иҟоуп, дара еиқәхаз аҭыхымҭақәеи адокументқәеи рҭагылазаашьа ҭырҵаауеит, ареставрациатә усурақәа рыплан еиҿыркаауеит.
Асахьаҭыхыҩцәа реидгыла иатәу Ацәыргақәҵатә зал хадаҿы асахьақәа зыҩназ ахыбраҿы амцакра ҟалеит ҳәа АҶА аҷаԥшьаҩ иахь адырра ҟалеит ажьырныҳәа 20-21 руха.
Аԥсны Амилаҭтә сахьатә галереиа аԥҵан иҳаҩсыз ашәышықәса 60-тәи ашықәсқәа рзы, уи афондқәа рҿы иҵәахын 4000 цыра асахьақәа. Уи афонд аҿы ишьҭан еицырдыруа аԥсуа ҟазацәа - Александр Шервашиӡе-Чачба, Варвара Бубнова, Борис Петров, Владимир Контарев, Марина Ешба, Витали Лакрба, Валери Гамгиа, Витали Џьениа, Амиран Адлеиба, Ольга Брендель, уҳәа аӡәырҩы русумҭақәа.
Амца дырцәон Аҟәа, Гәдоуҭа, Гәылрыԥшь, Очамчыра рымцарцәаратә гәыԥқәа 11, аха амца аанкылара анрылша асааҭ 7 рзоуп. Амца егьырҭ ахыбрақәа рахь аиасра иахьымӡаӡеит.
Атәыла ахада Апрокуратура хада адҵа риҭеит иҟалаз шыҟалаз ҭырҵаар азы.