АҞӘА, ажьырныҳәа 23 - Sputnik, Сариа Кәарцхьиаԥҳа. Иахьазы Аԥсны зыԥсы ҭаны иҟоу, Ленинград аблокада иҭакыз Нона Мол-оӷлы Санкт-Петербург имҩаԥырго ауснагӡатәқәа рахь днаԥхьоуп ҳәа иҳәеит Аԥсны Аветеранцәа рхеилак ахантәаҩы Закан Нанба Sputnik акорреспондент длыҿцәажәо.
"Нона Витали-иԥҳа Мол-оӷлы иахьа дәыӷбала Санкт-Петербургҟа амҩа дықәлеит. Уи уахь лцара еиҿнакааит Аԥсны иҟоу Россотрудничество Ахаҭарнакра. Лара лоуп иахьазы зыԥсы ҭаны Аԥсны инхо Ленинград аблокада иҭакыз рахьынтәи", - ҳәа иҳәеит иара.
Ажьырныҳәа 25 -29 рзы жәа-тәылак инареиҳаны рҟынтәи 50-ҩык Ленинград аблокада иалахәыз Санкт-Петербургҟа инеиуеит, ақалақь ахақәиҭтәра 80 шықәса ахыҵра иазку ауснагӡатәқәа рхы рыладырхәырц.