АҞӘА, ажьырныҳәа 24 - Sputnik. Украинатәи атҟәацәа аԥсахразы изгоз арра-транспорттә ҳаирплан Ил-76 Белгородтәи аобласт аҵакыраҿы Украина Арбџьар мчқәа икарыжьит ҳәа аанацҳауеит Урыстәыла атәылахьчара аминистрра.
"Аҳаирплан Ил-76 Белгородтәи аобласт аҵакыраҿы Украина Арбџьармчқәа икарыжьит Харковтәи аобласт аиланхарҭа аҟынтәи азенит-ракетатә комплекс ала", - аҳәоит адырраҭараҿы.
Иазгәаҭоуп, киевтәи арежим адырра шамаз ажьырныҳәа 24 рзы аурыс-украинатә ҳәаа аушьҭырҭатә ҭыԥ Колотиловка аҿы атҟәацәа еимырдараны ишыҟаз.
"Ус шакәызгьы анацисттә режим ари ашьаҿа ҟанаҵеит Урыстәыла ахара ахаранатәырц. Ари атеракт амҩаԥгарала киевтәи арежим иаанарԥшит ахаҿ иашаҵәҟьа– атәылауаа рыԥсҭазаарақәа хьаасгьы иамкит", - ҳәа азгәаҭоуп атекст аҿы.
Украинатәи атҟәацәа аԥсахразы изгоз арра-транспорттә ҳаирплан Ил-76 Белгородтәи аобласт аҵакыраҿы икаҳаит ажьырныҳәа 24 асааҭ 11:15 рзы. Аҳаирплан иҭан 65-ҩык УАМ аруаа рҟынтәи атҟәацәа, фҩык аекипаж алахәылацәа, хҩык урыстәылатәи аруаа. Дара зегьы ҭахеит.