АҞӘА, ажьырныҳәа 28 - Sputnik. Аԥснытәи Аҳәынҭқарратә филармониаҿы имҩаԥысит аԥсуа режиссиор Ҭенгиз Џьопуа зметраж кьаҿу ифильм "Агәаартра" аԥхьарбара.
Афильм Аԥсны Аџьынџьтәылатә еибашьра аҟны игаз Аиааира 30 шықәса ахыҵра иазкуп. Арежиссиор асцена аҟынтәи ишазгәеиҭаз еиԥш, афильм асиужет аҟны иаҳәоит, 15 шықәса зхыҵуаз арԥыс иаб дицны еибашьра дышцаз.
"Ари афильм аҟны шәара иара (арԥыс - азгә.) дыжәбаӡом. Аха, абаҩхатәра злоу, Аурыс драматә театр актриса, ан лроль назыгӡаз Милана Ломиаԥҳа - ллақҭеи, лхымҩаԥгашьеи цқьа шәахәаԥшыр, лажәақәа цқьа шәырзыӡырҩыр, убра дыжәбоит", - ҳәа иҳәеит Џьопуа.
Арежиссиор зегь ҭабуп ҳәа реиҳәеит артистцәа, хаҭа-хаҭала рыхьӡқәа иҳәеит афильм зыхәҭаа алазгалаз - актиорцәа Саид Лазба, Нодар Ҵәыџьба, Леван Габелиа, иара убас аоператор Џьано Ҵурҵумиа. Иара убасгьы иазгәеиҭеит, Аԥсны ишырацәаҩу абаҩхатәреи аҟыбаҩ злоу ауаа.