АҞӘА, хәажәкыра 19 – Sputnik. Аслан Бжьаниеи Владимир Путини ҭелла еицәажәеитхәа аанацҳауеит атәыла ахада ипресс-маҵзура.
Аԥсны ахада урыстәылатәи иколлега атәыла ахада иалхраан иигаз аиааира идиныҳәалеит. Бжьаниа иазгәеиҭеит абжьыҭара алҵшәақәа "урыстәылатәи анапхгара имҩаԥырго асоциал-економикатә ҿиара, ашәарҭадара аиҿкааара, жәларбжьаратәи аренаҟны атәыла аҭыԥ арӷәӷәара ркурс Урыстәыла атәылауаа адгылара шарҭо" шаанарԥшыз.
Аҳәынҭқарра ахадацәа инаҵшьны иазгәарҭеит ԥхьаҟагьы ишазыхиоу атәылақәа рыҩба рыбжьара аурыси аԥсуеи жәларқәа ринтересқәа аҧхьа иргыланы аиҩызара арӷәӷәара ишадгыло. Абри атәы аанацҳаит Аԥсны ахада ипресс-маҵзура.