Абызшәатә политиказы Аԥсны аҳәынҭқарратә усбарҭа аиҳабы Гәында Кәыҵниаԥҳа арадио Sputnik аефир аҿы еиҭалҳәеит аԥсышәала зҭыжьра алыршаз ашәҟәқәа арбану, иззырхәоу, аахәаҩ иоур ахьилшо, хәыда-ԥсада изырҭо атәы.
Ааигәа Аԥсныҟа иааргеит Аԥсны аҳәынҭқарратә бызшәатә политиказы аусбарҭа Краснодар иҭнажьыз хәы-хкык ашәҟәқәа 3000 цыра. Урҭ рыбжьара иҟоуп: аԥсуа бызшәа дырҵаразы арҵагатә цхыраагӡа; аҵарауаҩ Сергеи Зыхәба еиҭеигахьаз Андерсен илакәқәа; аԥсышәала аусмҩаԥгаразы ацхыраагӡа; Владимир Аҵнариа ахәыҷқәа ирзикыз ажәеинраалақәа "Сыԥсадгьыл Амра"; Платон Бебиа ахәыҷқәа рзы иажәеинраалақәа реизга "Амра ԥхоит".
"Арҭ ашәҟәқәа ҳазҭысыз ашықәс иалагӡаны иҟаҳҵақәаз роуп. Ҩ-хәҭакны иааҳгеит жәа-хкык, ашәҟәқәа убасгьы алабҿабатә хархәагақәа. Иааицҵаны зегьы 10 нызқь цыра ыҟоуп", - лҳәеит Кәыҵниаԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.