АҞӘА, мшаԥы 2 - Sputnik. Гагра араион аҿы идыргылоит асоциалтә ҵакы змоу ахыбрақәа ҳәа аанацҳаит ахада ипресс-маҵзура.
Пицундатәи Акультура ахан аҿы шьаҭанкылатәи аремонт мҩаԥысуеит. Аусурақәа ирылаган 2023 шықәсазы, сынтәа ихыркәшахоит. Иахьазы ахыб ԥсахуп 110 метр ԥшьыркца рҿы, акабинетқәа рҿы аԥенџьырқәа ԥсахуп. Асцена змоу аизарҭа зали ахыбра аԥхьатәи аҿаԥшыларатә хәҭеи ирҿуп.
Аусура иазоужьуп 39,2 миллион мааҭ араионтә биуџьет аҟынтәи. 18 миллион рхы иадырхәахьеит ҳәа иҳәеит анардадатә еиҿкаара ахаҭарнак Ҭеимураз Чкотуа.
Пицунда Акультура ахан
© Foto
Гагра араион Лӡаа ақыҭаҿгьы Акультура ахан ҿыц дыргылоит. Ажәытә хыбра блит 1998 шықәсазы. Ари аҭыԥ аҿы иргылахоит аҿыц. Ахан ҿыц ахышәаҵышәа 863 метр ԥшьыркца инаӡоит, еихагылакны иҟалоит, 270 тәарҭа ҭыԥ аиуеит. Аргылара хыркәшахароуп 2025 шықәсазы.
Лӡаа ақыҭаҿы иара убас ашкол №1 аҟны акрыфарҭеи аизарҭа зали дыргылоит. Ҩбаны еихагылоу аҿыԥшьы ашьаҭа аздырхиахьеит, аобиект 2024 шықәса анҵәамҭаз ахархәарахь инашьҭхоит.
"Ауснагӡатәқәа зегьы акабинетқәа рҿы ма аҩналарҭатә фоие аҿы имҩаԥаагон. Акрыфарҭа ҳамамызт. Акырҵуеит ҳазыԥшыижьҭеи. Уажәы ахәыҷқәа ишақәнагоу еиԥш акрырҿаҳҵартә аҭагылазаашьа ҟалоит", — лҳәеит ашкол адиректор Мимоза Еныкьԥҳа.
Лара лажәақәа рыла, акрыфарҭеи аизарҭа зали рыҟамзаара аҵаҩцәа рхыԥхьаӡара ианырит. Уажәы ара аҵара рҵоит 110-ҩык аҵаҩцәа. Еныкьԥҳа агәыӷра аалырԥшит урҭ рхыԥхьаӡара ԥхьаҟа иацлап ҳәа.
Лӡаа ашкол
© Foto