АҞӘА, мшаԥы 9 – Sputnik. Урыстәыла иҟоу Аԥсны Ацҳаражәҳәарҭа абжьгаҩ-нашьҭымҭа Мадина Аҩӡԥҳа иланашьоуп "Ахьӡ-Аԥша" аорден III аҩаӡара. Абри атәы аанацҳауеит Урыстәыла иҟоу Аԥсны ахаҭарнакра апресс-маҵзура.
Аҩӡԥҳа ари аорден ланашьоуп амилаҭ аҳаҭыр ашьҭыхраҿ ллагалеи, Аԥсни Урыстәылеи реиҩызара арӷәӷәареи, акыршықәса ламысцқьалатәи лусуреи рзы.
Мадина Аҩӡԥҳа - ддипломатуп, Урыстәыла иҟоу Аԥсны Ацҳаражәҳәарҭа абжьгаҩ-нашьҭымҭа. Ԥхынҷкәынмза 2021 шықәсазы Урыстәыла иҟаз Аԥсны ацҳаражәҳәаҩ Игор Ахба имаҵураҟынтәи ихы данақәиҭыртә, Аԥсны Адәныҟатәи аусқәа рминистрра ахаҭарнак ҷыдас дҟаҵан.
Абҵарамза 30 2022 шықәсазы ари аҭыԥ аҟны лара диԥсахуеит Алхас Кәыҵниа.