МОСКВА, мшаԥы 10 – Sputnik, Анжелика Бениаԥҳа. Атеатр "Геликон-Опера" азал "Покровский" аҿы Алиса Гыцԥҳа II лмузыкатә еицлабра алауреатцәа рықәгылара мҩаԥысит.
Владислав Бириуков (абаритон) иҳәеит иԥсҭазаараҿы раԥхьатәи авокалтә еицлабра зеиԥшыҟам аԥышәа, алшара дуқәа шинаҭаз, ишизаанартыз захь ахынҳәра дазыгәышьуа ақалақь ссир.
"Аҟәа сыхнахит. Ақалақь ишахәҭоу абаразы саамҭа маҷын, аха ҳахьынхоз аҭыԥ инаркны афилармониа аҟынӡа сызнысуаз амҩа аԥшӡарақәеи афҩеилаӡҩақәеи аҽазныкгьы уахь схынҳәыроуп ҳәа агәаанагара сырҭеит", - ҳәа иҳәеит Бириуков.
Аԥсны аҳҭнықалақь Кристина Поповагьы (меццо-сопрано) дыхнахит.
"Аԥсныҟа анеира ахьыслахьынҵахаз сеигәырӷьоит. Гәахәара дула сеиҭахынҳәуеит. Аицлабраҿы ҩаӡара ҳаракыла сықәгылара ахә ршьап ҳәа сазыԥшымызт, "Геликон" аҟынтә аԥхьахә хадагьы сыззыԥшымыз лшара духеит. Аицлабра жьҭаарамзазы ишхыркәшазгьы асезон зегьы ҳконцерттә ԥсҭазаара еилашуан. Насыԥуп Алиса Шьалуа-иԥҳа лмузыкатә еицлабра ҳахьалахәхаз. Лара амузыкантцәа ҿарацәа ацхыраара, адгылара рылҭоит. Аицлабра еиҳа-еиҳа аҽарҭбаалароуп", - лҳәеит лара.
"Геликон" аҿы амузыкатә концерт мҩаԥылгон атеатр асолистка, Аԥсны жәлар рартистка, Урыстәыла зҽаԥсазтәыз артистка Алиса Гыцԥҳа. Ахәылԥаз апрограмма ааԥынреи абзиабареи ирызкын.
"Иҳаӡбеит аконцерт апрограмма ҩыџьа рзы ишьақәҳаргыларц. Абаритони меццо-сопранои реицықәгылара рацәак ахархәара амам. Амузыкантцәа даара аҟыбаҩ ҷыда злоу роуп, аԥеиԥш рыдубалоит, уажәнатә аоператә театрқәа рҿы иқәгылоит. Владислав - Нижни Новгород аопереи абалети ртеатр асолистс дыҟоуп, Кристина Атеатр Ду ахь днарыԥхьахьеит", - ҳәа еиҭалҳәоит Гыцԥҳа.
Алиса Гыцԥҳа II жәларбжьаратәи лмузыкатә еицлабра мҩаԥысуан 2023 шықәса жьҭаарамзазы Москвеи Аҟәеи.
"Геликон-Опера" аҿы аконцерт алахәхара амузыкантцәа ҿарацәа иҷыдоу аԥхьахә аҳасаб ала иранашьахеит. Ҩышықәсоуп атеатр анапхгара асеиԥш азырыӡбоижьҭеи. Ҵыԥх ари аԥхьахә ланашьахеит Надежда Гамаиун. Уажәы лара Владикавказ Мариинтәи атеатр афилиала аҟны солисткас дыҟоуп.