АҞӘА, хәажәкыра 11 - Sputnik. Ателеканал "Абаза-ТВ" аԥҵаҩ ҿыцс дҟалеит 31 шықәса зхыҵуа анаплакҩы Захар Агрба, абри атәы аанацҳауеит ателехәаԥшра апресс-маҵзура.
Агрбеи ателеканал адиректор хада Руслан Ҳашыги ҩынтә еиԥылахьеит. Дара "Абаза-ТВ" иадҳәалоу аҟазаратә, атехникатә, афинанстә зҵаарақәа ирылацәажәеит.
Захар Агрба игәаанагарала, 17 шықәса ирылагӡаны ателеканал аԥышәеи аҳаҭыри арҳаит. "Абаза-ТВ" ихьыԥшым телехәаԥшраны ишыҟац иаанхоит, ганрацәала ацхыраара аҭахоит иҳәеит иара.