АҞӘА, мшаԥы 24 – Sputnik. Аԥсны Аҳәынҭқарра Ахада Аслан Бжьаниа аерманцәа ргеноцид иалаӡыз ргәалашәара амш инамаданы аерман жәлар рыхьӡала адышшылара ҟаиҵеит.
"Аерман жәлар ргәырҩа рыцеиҩаҳшоит. Адунеи зегьы аҟнеиԥш, ҳаргьы иахьа иаҳгәалаҳаршәоит аҩажәатәи ашәышықәса алагамҭазы иҟалаз ахлымӡаах – аерманцәа ргеноцид", — аҳәоит ахада ишәҟәаҿы.
Ахада иазгәеиҭеит Аԥсны агәаанагара шеиҭанамкуа — хыԥхьаӡара рацәала ауаа рнырҵәара ҟалашьа змам акакәны ишыҟоу.
"Рхәыҷқәеи дареи рыԥсҭазаарақәа еиқәырхо аерманцәа Аԥсныҟа иааит. Аҩбатәиԥсадгьылынгьы ирзыҟалеит. Урҭ рхылҵшьҭрақәа иахьа аԥсуа ҳәынҭқарра аҿиара иалахәуп", — аҳәоит ахада ишәҟәаҿы.
Аслан Бжьаниа Аԥсны иҟоу аерман диаспора гәыкала дрыдышшылеит, ирзеиӷьеишьеит аҭынчреи аизҳазыӷьареи.