АҞӘА, мшаԥы 26 – Sputnik. Аԥсны аҵакыраҿы аекскурсиамҩаԥгаҩцәас аус зур зылшо ареспублика атәылауаа мацара роуп ҳәа Sputnik иазеиҭеиҳәеит Ауаажәларратә палата алахәыла Асҭамыр Ахба.
"Урыстәылатәи Афедерациа аҵакыраҿгьы абас еиԥш иҟоу анормақәа аус руеит. Иҟоуп арегионқәа егьырҭ арегионқәа иртәу ауаа аус рур ахьыҟамло. Иаҳҳәап, Краснодартәи атәылаҿацә аҟынтәи Ареспублика Ҟрым уцаны аекскурсиақәа рымҩаԥгара ҟалаӡом. Ҟрым атуризм аминистрра аҟны азшьаҭара иахысыз роуп уа аекскурсиа амҩаԥгара зылшо", – ҳәа иҳәеит Ахба.
Иара убасгьы иазгәеиҭеит, Аԥсни Урыстәылеи ртуристтә еиҿкаарақәа рыбжьара ишыҟоу аиқәышаҳаҭра. Уи инақәыршәаны урыстәылатәи атурфирмақәа ирылшоит атургәыԥқәа реиҿкаара, Аԥсны атуризм аминистрра аккредитациа знаҭаз агидцәа адԥхьаланы ареспубликаҿы аекскурсиақәа рымҩаԥгара.
Шәачатәи агидцәа реилазаара ашшит Аԥсны азинмчы змоу усбарҭақәа русура иаԥырхагоуп ҳәа. Аԥсны Аекскурсиамҩаԥгаҩцәа рассоциациа урыстәылатәи рколлегацәа иргәаладыршәеит азакәан инақәыршәаны Аԥсны аҵакыраҿы аекскурсиамҩаԥгаҩцәас аус зур зылшо ареспублика атәылауаа мацара шракәу.