Агазеҭ "Аԥсны" 105 шықәса ахыҵра инамаданы ажурналистикеи акультуреи рыҿиараҿы рлагалазы гәыԥҩык аусзуҩцәа аҳаҭыртә хьыӡқәа рыхҵан. Арадио Sputnik аефир аҿы Аԥсны зҽаԥсазтәыз ажурналист ҳәа ахьӡ зыхҵоу Шьарида Торчуаԥҳаи Аԥсны Акультура зҽаԥсазтәыз ҳәа ахьӡ зыхҵоу Хьыбла Ҳашԥҳаи еиҭарҳәеит, агазеҭ аҿы аусура ишалагаз, иахьатәи аамҭа иаанаго аҿыцрақәа русураҿы ишаларгало атәы.
Шьаридеи Хьыблеи ҩажәашықәса инацны агазеҭ "Аԥсны" аҿы аус руеит. Арадиоефир аҿы еиҭарҳәеит уахь ишнеизи инеиԥынкыланы шықәсы рацәа аредакциаҿы русура ирзацу агәыбылра атәи. Шьарида Торчуаԥҳа дазааҭгылеит аамҭа иаанаго аҿыцрақәа рышҽақәдыршәо.
"Ажәытә абиԥара русура шьаҭас иҟаҵаны ԥхьаҟа аус иацҵатәуп. Аамҭа ҿыц иаанаго алагалақәа рыда ԥсыхәа шыҟам ҳбеит ҳхатә ԥышәала. Иахьа еиҳаби еиҵби асоциалтә даҟьақәа рҿы ианыҟоу, ҳаргьы уи ада ԥсыхәа ҳамаӡам. Ҳхьысҳан, иҳамаӡамызт асаит. Ҩышықәса раԥхьа уи еиҿкаан, иара цхыраагӡа духеит, избанзар, автортә материалқәа рыла агазеҭ ҳархиоит, аха аинформациа цоит асаит аҿы. Агазеҭ ақьаад вариант сара сзы акырӡа аҵанакуеит. Уи баша цәажәарам", - ҳәа инаҵылшьит лара.
Арадиостудиа асасцәа алацәажәеит аколлектив аҩнуҵҟа иҟоу аилибаакара атәы, еиҭарҳәеит агазеҭ аԥхьаҩцәа ирыдҳәалоу хҭысқәак.
Инеиҵыху аиҿцәажәара шәазыӡырҩыр шәылшоит аудиофаил аҿы.