АҞӘА, мшаԥы 27 – Sputnik. Аиԥхныҩра Dagestan Wild Trail 2024 рхы аладырхәит Аԥснынтәи атлетцәа Дамеи Канџьариа, Саид Аргәын, Денис Саманба, Асҭамыр Мамед-оӷлы. Абри атәы аанацҳауеит аҿари аспорти рзы Аҳәынҭеилакы.
Зегь раасҭа ихы бзиан иааирԥшит Дамеи Канџьариа, аиааира аҟынӡа иара изымхаӡеит сааҭбжак. Аҩбатәи аҭыԥ ааникылеит.
"Иара илымшозгьы илиршеит, 17 сааҭ дмааҭгылаӡакәан ашьхараҿ дыҩуан, 188-ҩык аспортсменцәа драԥысит, аҩбатәи аҭыԥгьы ааникылеит", - ҳәа рҳәеит атлетика лас азы Афедерациа аҟны.
Саид Аргәын ихы ԥишәеит 4000 метра аҳаракыраҿ 65 километра аҩраҿ. Иара 500-ҩык драԥысит.
Денис Саманбеи Асҭамыр Мамед-оӷлыи рхы аладырхәит атреилраннинг. Араҟа Асҭамыр Мамед-оӷлы раԥхьаӡа акәны ихы алаирхәит ихгьы бзиан иааирԥшит, Саманба аԥшьбатәи аҭыԥ ааникылеит 974-ҩык драԥысит.