АҞӘА, лаҵара 7 - Sputnik, Бадраҟ Аҩӡба. 1941-1945 шш. рзтәи Аџьынџьтәылатә еибашьра Ду аан игаз Аиааира 79 шықәса ахыҵра аҳаҭыраз аҿар ракциа "Аԥсны Аиааира аволонтиорцәа" алагеит Аҟәа.
Акциа иалахәуп астудентцәа, ашколхәыҷқәа, аҿартә еиҿкаарақәа рхаҭарнакцәа, урыстәылатәи аицџьынџьуаа.
Дара Идырым асолдаҭ ибаҟа аҿаԥхьа ашәҭшьыҵәрақәа шьҭарҵеит, анаҩс "Москва Аҩны" ахь инеит аконцлагерқәа ирҭакыз рџьынџьуаа рыԥшааразы аԥсуа курсантцәа русура иазку афильм "Поиск" ахәаԥшреи алекциа азыӡырҩреи рзы.
Акциа еиҿыркааит Аԥсны иҟоу урыстәылатәи азинхьчаҩцәа Рцентри акультуратә фонд "Платформеи". Иара ажурналист Дмитри Статеинов игәалашәара иазкуп.