АҞӘА, лаҵара — 12 Sputnik. Аԥсны агәабзиарахьчара аминистр Едуард Быҭәба амедиеҳәшьцәа рзанааҭтә ныҳәамш рыдиныҳәалеит. Абри атәы аанацҳауеит аусбарҭа апресс-маҵзура.
Агәабзиарахьчара аминистр иазгәеиҭеит, амедиеҳәшьцәа аӡәырҩы Аԥсны Аџьынџьтәылатә еибашьраан иуадаҩыз аҭагылазаашьаа аҟны аибашьцәа ацхыраара ду шрырҭоз.
"Аибашьра ашьҭахьтәи ашықәсқәа рзгьы ҳмедиеҳәшьцәа имариамыз амҩа ианысит. Ачымазаҩ игәабзиара ашьақәыргылараз 80% рҟынӡа иназыгӡо амедиеҳәшьцәа роуп. Ҳмедиеҳәшьцәа хамеигӡарада рус гәцаракрыла иазнеит акоронавирустә ҽкчымазара COVID-19 апандемиа аамҭазы", - ҳәа аҳәоит адныҳәалараҟны.
Быҭәба амедиеҳәшьцәа ирзеиӷьеишьеит игәышьҭыхгоу ахҭыс бзиақәеи, иҭынчу амшқәеи, ачымазҩцәа рҟынтәи гәыкала аҭабуреи.