АҞӘА, лаҵара 24 - Sputnik. Атуристә аалыҵ аԥҵара иалацәажәараны иҟоуп Аԥсни Ҟрыми еицырзеиԥшу аусутә хеилак раԥхьатәи аилатәараҟны, абри атәы ТАСС азеиҭеиҳәеит Ареспублика Ҟрым Анапхгара аԥыза-министр актәи ихаҭыԥуаҩ Георги Мурадов.
"Аԥсни Ҟрым акурортқәеи мшынла реимадара азҿлымҳара аиуеит. Аԥснынтәи ауааԥсыра мшынла иааны Ҟрым аҭыԥԥшӡарақәа: Керчь, Иалта, Севастополь рбар рылшоит, иара убас Ҟрымынтәи мшынла Аԥсныҟа ицалар ҟалоит. Ари азҵаара аус адаҳулоит", — иҳәеит Мурадов.
Аԥсни Ҟрыми еицырзеиԥшу аусутә хеилак раԥхьатәи аилатәара мҩаԥгахоит ҭагалан 2024 шықәсазы, Аҟәа.
Уаҟа иалацәажәоит Аԥснынтәи Ҟрымҟа атауарқәа ргареи Ҟрымынтәи Аԥсныҟа аалыҵқәа раагареи.
2016 шықәсазы Ареспублика Ҟрыми Аԥсны Аҳәынҭқарреи рыбжьара ахәаахәҭра-економикатәи, аҭҵаарадырра-техникатәи, агуманитартәи усеицуразы Аиқәшаҳаҭра анапы аҵаҩын.